വന്ധ്യമേഘം

ഒരു പകല്‍ കൂടി എരിഞ്ഞടങ്ങുന്നുയീ -

യിരവും,പകലും,ഇണ ചേരുമീ സന്ധ്യയില്‍

ഒരു കടലോള,മെനിക്കിഷ്ടമെന്നോതി ഞാന്‍

മറുമൊഴി കേള്‍ക്കുവാന്‍ കാത്തു നില്‍ക്കെ ,

ഇഴഞ്ഞണയുംമിരുട്ടില്‍ മുഖമൊളിപ്പിക്കും നിന്‍റെയീ -

മൌനവും വാചാലമെന്നറിയുന്നു ഞാന്‍..

ജാലകചില്ലിലെന്‍ നിഴല്‍ മാത്രം മന്ത്രിച്ചു

നമുക്കിടയിലീ ചുടു നിശ്വാസം മാത്രമെന്ന് ..

നിനക്ക് ഞാനും,എനിക്ക് നീയുമിനിയില്ലെന്ന്

ജലകണമിറ്റിച്ചു വീഴ്ത്തുമിലചാര്‍ത്തു -

മൊരു മാത്ര കണ്ണീരണിഞ്ഞുനിന്നു.

പെയ്തൊഴിയാതെ കാര്‍മേഘവും,നീയും,

നീ തന്ന വാക്കും,നിന്‍ വിരല്‍ത്തുമ്പുതിര്‍ത്ത

സ്നേഹാമൃതത്തിന്‍ പരാഗരേണുക്കളും ,

വിട ചൊല്ലിപ്പിരിയുമീ രാവില്‍,വെണ്‍ -

ചന്ദ്രക്കല വരും,നക്ഷത്രങ്ങള്‍ വരും.

താരാപഥത്തിന്‍ പ്രഭയില്‍ വെണ്‍ ചന്ദ്രനീ -

പ്രേമാര്‍ത്ഥിനിയാ,മാമ്പലിനെ മറക്കാമന്യൂനം

പൊടിഞ്ഞിതെന്തേ കണ്ണുനീരെന്നോ,യില്ല

പടര്‍ന്നിതെന്‍ കണ്ണില്‍ കണ്മഷി,യത്രേയുള്ളൂ.